Belén Constenla, Fon Cortizo, Mariana Carballal, Romina Doce e Xosé Manuel Esperante conforman o xurado da quinta edición do Curtas Armadiña, certame audiovisual organizado pola ACDeM Armadiña que se celebrará do 11 ao 17 de novembro e no que este ano compiten curtametraxes en lingua galega, curtametraxes localizadas en Galicia e curtametraxes producidas por produtoras de Galicia ou de fóra de Galicia cuxa dirección sexa galega.
Belén Constenla é unha actriz cunha longa traxectoria na televisión, en canles autonómicas e estatais (Serramoura, Pazo de familia, Padre Casares, Escoba, Pratos Combinados; Matadero, Isabel, Hospital Central ou El comisario, entre moitas outras), como no cinema (La playa de los ahogados, Vilamor, Pradolongo, Dos fragmentos/Eva) e no teatro. O seu traballo foi destacado en tres ocasións nos premios de teatro María Casares e o seu labor en Los muertos van deprisa foi premiado nos Mestre Mateo 2009.
Fon Cortizo é un director e guionista vigués que, despois de Contrafaces (2016), percorre os principais festivais galegos e internacionais con tres curtametraxes documentais, Aysha (premiado no festival de Nova Iorque DUAF e no Curtocircuíto), Americano e Filomena. Na actualidade traballa na súa primeira longametraxe de ficción, 9 Fugas.
Mariana Carballal é directora e recoñecida actriz de teatro, televisión e cinema. Traballou en series de televisión como Fariña, Serramoura, Casa Manola, Mareas Vivas, Terras de Miranda, Pratos Combinados ou O show dos Tonechos; Vivir sin permiso, Hospital Central, Manos a la obra ou Nada es para siempre; tamén en filmes como Quien a hierro mata, Elisa y marcela, La piel que habito ou O ano da carracha. É a creadora e directora da sitcom Escoba! para a TVG e dirixiu os 50 primeiros capítulos de Libro de familia. Exerceu de directora e presentadora en distintas galas, dirixiu obras de microteatro e exerceu como docente en distintas ocasións.
Romina Doce é unha produtora nada en Bos Aires que se afincou hai dezaoito anos en Galiza, terra dos seus avós. Cursou estudos de Produción Audiovisual en Vigo e posteriormente fundou en Pontevedra en 2008 Producciones Mutantes, empresa cunha ampla experiencia no mundo da publicidade e o videoclip.
Xosé Manuel Esperante é un actor que compaxina a súa actividade no eido teatral coa participación en diferentes proxectos audiovisuais. Traballou en longametraxes como Quien a hierro mata, Lobos sucios, El tiempo de Plácido Meana, O ano da carracha ou Fragmentos de Brand; en curtametraxes como Inútil, pola que acadou o Premio ao Mellor Actor no Festival de Curtametraxes de Noia, Inercia ou A Subela. A Estiba, Fariña, Hospital Real, El comisario, Amar en tiempos revueltos ou O clube da calceta son algunhas das series de televisión onde podemos velo.
O Xurado Oficial escollerá as pezas que gañarán a Áncora de Ouro (1 000 euros e trofeo) e a Áncora á Mellor Curtametraxe Animada (500 euros e trofeo). O público asistente será o encargado de escoller a Áncora de Prata (500 euros e trofeo) e a Áncora ao Mellor Vídeo Musical será outorgado por alumnado do instituto local (300 euros e trofeo). Por segundo ano, CREA, a Asociación de Profesionais da Dirección e a Realización de Galicia, colaborará co certame entregado o Premio á Mellor Dirección.